Samhjalp_des_2019

9 grein fyrir í upphafi og í hverju horni eru einstaklingar sem allir vilja leggja sitt af mörkum við að gera líf fólks betra. Við erum með góða ráðgjafa og gott starfsfólk innan okkar raða, fólk sem vill af einlægni hjálpa til.“ Valdimar segir að það sé gott að koma inn í þannig umhverfi og í raun nokkuð sérstakt, það sé það sem gerir það heillandi. „Ég sagði það í ráðningarferlinu að ef það stæði til að ráða einhvern til þess að gera áfram það sama og hefur verið gert, án þess að ég hafi miklar skoðanir á því hvað hefur verið gert, þá væri ég ekki endilega rétti maðurinn í starfið,“ segir Valdimar Þór. „Ég er maður framkvæmda og líður best þegar fara þarf frá A til B. Að því sögðu þá er samt rétt að halda því til haga að hér er fólk búið, í mörg ár, að hlaupa með boltann og það hefur verið vel gert. Við hjá Samhjálp ætlum að hlaupa með hann áfram og lengra, sem er í samræmi við það sem allir vilja stefna að.“ Kynslóðabil í neyslumunstri Víkjum þá umræðunni að öðru. Samhjálp nýtur mikillar velvildar þeirra sem á annað borð vita af starfi samtakanna. Þannig má nefna opinberar stofnanir, þeirra sem lagt hafa starfinu lið með sjálfboðavinnu í gegnum árin eða stutt það með fjárframlögum. Verkefni samtakanna eru ærin og það liggur í hlutarins eðli að í þeim felst nokkur áskorun. Þannig hefur það verið frá upphafi og verður að öllum líkindum í framtíðinni, enda felst það í því að sinna þeim sem halloka hafa farið í samfélaginu af ýmsum ástæðum og byggja upp þá einstaklinga á ný. Aðspurð um þessa þætti segir Helga Lind að á síðustu árum virðist hafa orðið breytingar hvað varðar vímuefnaneyslu í samfélaginu og samhliða því hafi orðið viðhorfsbreyting meðal almennings. „Við erum að sjá meira af ungu fólki, sem neytir sterkari efna, leiðist hraðar inn í neyslu og fleiri og fleiri falla frá um aldur fram sem er ólýsanlega sorglegt,“ segir Helga Lind. „Það virðist hafa orðið ákveðið kynslóðarbil í neyslumunstri í samfélaginu. Þessu þurfa allar meðferðarstofnanir á Íslandi að átta sig á og tengja starf sitt við hraðann í samfélaginu. Hlaðgerðarkot er þar ekki undanskilið. Það er svo margt í samfélaginu sem einstaklingurinn þarf að takast á við, umfram það hefðbunda sem hefur fylgt okkur í gegnum kynslóðirnar, en í nútíma samfélagi er pressan á einstaklinginn að standa sig meiri en nokkru sinni fyrr. Þetta getur leitt til þess að fólk leitist við deyfa sig, slaka á pressunni og þá jafnvel með áfengi og eða vímuefnum, jafnvel ungt fólk. Þegar fólk síðan byrjar að fikta er aldrei hægt að segja fyrir fram hvar það endar. Á þeim árum sem ég hef starfað við barnavernd hef ég verið að sjá yngri og yngri krakka byrja í neyslu sem byrjar oft með fikti, gjarnan sem leið til deyfa sig í fjandsamlegum aðstæðum og vegna erfiðleika. Það er og verður áskorun að takast á við þetta.“ Valdimar Þór bætir við að stundum sé haft orð á því að alkóhólisminn sé í raun að deyja út. „Þar er vísað til þess að hinum hefðbundnu alkóhólistum fari fækkandi. Þeir eru auðvitað enn til staðar og margir ná aldrei bata af því að þeir leita sér ekki aðstoðar,“ segir Valdimar Þór. „Á sama tíma eru þó að koma upp fleiri og fleiri mál, eins og Helga Lind vísaði hér til, sem tengjast misnotkun á ávísuðum lyfjum auk annarrar neyslu sem oft reynist erfitt að greina. Það er ekki lengur bara vínlykt af fólki, heldur er fólk að neyta ýmissa efna sem ekki sjást utan á þeim. Skaðinn af þeim er ekki síðri en af áfenginu og í mörgum tilvikum heldur verri. Það er því mikilvægt að meðferðarstofnanir séu vel á tánum í þessum efnum og í stakk búnar til að veita þessum einstaklingum viðeigandi aðstoð.“ Fagleg vinnubrögð Í framhaldi af þessu er þó vert að minnast þess að töluverðar breytingar hafa orðið á meðferðarstarfi Samhjálpar í Hlaðgerðarkoti, eins og áður hefur verið fjallað um hér í blaðinu. Þær felast meðal annars í því að afvötnun hefur verið hætt og meðferðin lengd. Meðferðin tekur nú 12 vikur og eftir atvikum er hún lengri. Á sama tíma er það ekkert launungarmál að Samhjálp byggir starf sitt á kristnum gildum og hefur gert frá upphafi. Aðspurð um þessa þætti segja bæði Valdimar Þór og Helga Lind að jafnvel þó svo að heildarstarfsemi Samhjálpar byggi á kristnum gildum þá sé mikilvægt að meðferð áfengis- og vímuefnaneytenda sé byggð á faglegum grunni og viðurkenndum aðferðum. „Það er og hefur verið stefna stjórnar Samhjálpar að ráða einstaklinga út frá faglegum forsendum. Okkar hlutverk er einmitt að auka þá faglegu þekkingu og vinnubrögð sem hefur verið unnið með á síðustu árum,“ segir Valdimar Þór og vísar til þess að embætti Landlæknis gerir reglulega úttekt á starfsemi Hlaðgerðarkots líkt og annarra meðferðarstofnana. Valdimar Þór hóf störf hjá Samhjálp 1. nóvember sl. en Helga Lind hefur störf á nýju ári.